Naʻe fakahā ʻe he ʻEikí ʻi he Fuakava Motuʻá kia Mōsese mo e kakai ʻIsileli ʻi muʻá ko e ngaahi meʻakai pē ʻe niʻihi ʻoku maʻá, pe ko hono fakalea ʻe tahá, ʻoku feʻunga ke kai. Naʻe ʻi ai hano fuʻu mālohi lahi ʻo hono fakafaikehekeheʻi ʻe he kakai ʻIsilelí ʻa e meʻakai ʻoku maʻá mo e meʻakai ʻoku taʻemaʻá ʻi he anga ʻo ʻenau moʻui fakalotu mo fakasōsialé. Naʻe ʻi ai ʻa e fanga manu ʻe niʻihi, fanga manupuna, mo e ika naʻe lau ʻoku maʻa pea ʻoku lelei ke kai, hili ia naʻe ʻi ai ʻa e niʻihi ia naʻe taʻemaʻa pea naʻe tapui ke ʻoua ʻe kai (Lev. 11; Teut. 14:3--20). Naʻe ʻi ai foki mo e kakai mahaki ʻe niʻihi naʻe lau ʻoku taʻemaʻa.

Ko hono ʻuhinga ʻo e maʻá ʻi he meʻa fakalaumālié, ko e tauʻatāina ia mei he angahala mo e ngaahi holi kovi. ʻOku ngāue ʻaki ai ʻa e foʻi leá ke fakamatalaʻi ha taha ʻa ia ʻoku angamaʻa pea ʻokú ne maʻu ha loto-maʻa (Same 24:4). Naʻe ʻi ai ha ngaahi fakahinohino makehe maʻu pē ki he kakai ʻo e fuakava ʻo e ʻOtuá ke nau maʻa (3 Nīfai 20:41; T&F 38:42; T&F 133:5).

Ko ia ia ʻoku nima maʻa mo loto-māʻoniʻoní ʻe ʻalu hake ki he moʻunga ʻo Sihová [ʻEikí], Same 24:3--5. Ke ʻoua naʻa ui ko e taʻetapu pe taʻemaʻa ha tangata ʻe toko taha, Ngāue 10:11--28. Te mou lava koā ke sio hake ki he ʻOtuá ʻi he ʻaho ko iá ʻaki ʻa e loto-maʻa mo e nima maʻa? ʻAlamā 5:19. ʻE tauteaʻi ʻe he ʻEikí ʻa Saione kae ʻoua ke ne maʻa, T&F 90:36. Ke maʻa ʻa kimoutolu ʻoku fua ʻa e ngaahi ipu ʻa e ʻEikí, T&F 133:4--5, 14 (ʻĪsaia 52:11).