Ko e tuʻunga ia ʻoku taʻofi ai ʻa e fakalakalaka ʻa ha taha pea ʻikai tali ke ne hū ki he ʻafioʻanga ʻo e ʻOtuá mo hono nāunaú. ʻOku tuʻunga kehekehe ʻa e anga ʻo e malaʻiá. Ko kinautolu kotoa pē ʻoku ʻikai te nau maʻu hono kakato ʻo e hakeakiʻi fakasilesitialé ʻe fakangatangata ʻa e anga ʻo ʻenau fakalakalaká mo honau ngaahi faingamālié, pea te nau malaʻia ʻo aʻu ki he tuʻunga ko iá.

ʻE malaʻia ʻa kimoutolu ko e kau mālualoi! ko ia te mou malaʻia lahi ai, Mātiu 23:14. Ko ia te ne lohiakiʻi ʻa e Laumālie Māʻoniʻoní ʻoku tuʻutāmaki ia ki he malaʻia taʻengata, Maʻake 3:29. Ko kinautolu naʻe fai koví te nau ʻalu atu ki he toe tuʻu ʻo e fakamalaʻia, Sione 5:29 (3 Nīfai 26:5). Ko ia ia ʻoku kai mo inu taʻe-fakaʻapaʻapá, ʻokú ne kai mo inu ʻa e malaʻia kiate ia, 1 Kol. 11:29 (3 Nīfai 18:28–29). Ko ia ia ʻe ʻikai fakatomala, pea papitaiso, pea kātaki ki he ngataʻangá, kuo pau ke ne malaʻia, 2 Nīfai 9:24 (Maʻake 16:16; ʻEta 4:18; T&F 68:9; 84:74). ʻE mamahi lahi ange ʻa e kau fai angahalá ke nofo fakataha mo e ʻOtuá, ʻi haʻanau nofo fakataha mo e ngaahi laumālie malaʻia ʻi helí, Molom. 9:4. Ka ko ia ia ʻoku ʻikai te ne fai ha meʻa kae ʻoua ke toki fekauʻi ʻoku malaʻia ia, T&F 58:29. Ko ia ia te ne maʻu hano kakato ʻo e fuakava foʻou mo taʻengatá kuo pau te ne tauhi ʻa e fonó, pe ʻe fakamalaʻiaʻi ia, T&F 132:6.