Naʻe fokotuʻu ʻa e kātoanga ʻo e Laka Atú ke tokoniʻi ʻa e fānau ʻa ʻIsilelí ke nau manatu ki he taimi naʻe fakalaka ai ʻa e ʻāngelo fakaʻauhá ʻi honau ngaahi falé pea fakatauʻatāinaʻi ʻa kinautolu mei he kau ʻIsipité (ʻEke. 12:21–28; 13:14–15). ʻOku hoko ʻa e toto ʻo e fanga lami taʻe-hanau-mele ʻa ia naʻe ngāue ʻaki ke hoko ko ha fakaʻilonga ki hono fakahaofi ʻo ʻIsileli ʻi he kuonga muʻá, ʻoku hoko ia ko ha fakataipe ʻo Sīsū Kalaisi, ko e Lami ʻa e ʻOtuá, ʻa ia naʻe hanga ʻe heʻene feilaulaú ʻo huhuʻi ʻa e faʻahinga kotoa ʻo e tangatá.

Ko ʻeni ʻa e tuʻutuʻuni ʻo e laka atú, ʻEke. 12:43. Ko e Laka Atú ʻi he ʻOhomohe Fakaʻosí, Mātiu 26:17–29 (Maʻake 14:12–25). Vakai ki he Lami ʻa e ʻOtuá ʻa ia te ne ʻave ʻa e angahala ʻa e māmaní, Sione 1:29, 36. Ko Kalaisi ko hotau feilaulau ʻo e laka atú kuo hifoaki maʻatautolu, 1 Kol. 5:7. Kuo huhuʻi ʻa kitautolu ʻi he taʻataʻa ʻo Kalaisí, ʻo hangē ha lami taʻe-hano-mele, pea taʻe-hano-ʻila, 1 Pita 1:18–19. Tui ki he Lami ʻa e ʻOtuá, ʻa ia ʻoku ʻave ʻa e ngaahi angahala ʻa e māmaní, ʻAlamā 7:14. Ko e Kāingalotu ko ia ʻoku nau tauhi ʻa e Lea ʻo e Potó ʻe fakahaofi ʻa kinautolu ʻo hangē ko e fānau ʻa ʻIsilelí, T&F 89:21. Ko e Lami kuo tāmateʻi talu mei hono fakatupu ʻo e māmaní, Mōsese 7:47.