Ko e ngaahi kií ko e ngaahi totonu ia ʻo e kau palesitení, pe ko e mālohi ia kuo foaki mai ʻe he ʻOtua ki he tangatá ke tataki mo puleʻi ʻaki ʻa e lakanga fakataulaʻeiki ʻo e ʻOtuá ʻi he māmaní. ʻOku ui ʻa e kau maʻu lakanga fakataulaʻeikí ki he ngaahi lakanga fakapalesitení ʻo nau maʻu ʻa e ngaahi kií meiate kinautolu ʻoku nau maʻu ʻa e mafai kiate kinautolú. ʻOku ngāue ʻaki ʻa e lakanga fakataulaʻeikí ʻe he kau maʻu lakanga fakataulaʻeikí ʻo fakatatau ki he ngaahi fakangatangata kuo fakahā kiate kinautolu ʻe kinautolu ʻoku nau maʻu ʻa e ngaahi kií. ʻOku maʻu ʻe he Palesiteni ʻo e Siasí ʻa e ngaahi kī kotoa pē ʻo e lakanga fakataulaʻeikí (T&F 107:65–67, 91–92; 132:7).

Naʻe maʻu ʻe Pita ʻa e ngaahi kī ʻo e puleʻangá, Mātiu 16:19. Naʻe maʻu ʻe Maikeli (ʻĀtama) ʻa e ngaahi kī ʻo e fakamoʻuí ʻo fakatatau ki he tuʻutuʻuni ʻa Sīsū Kalaisi, T&F 78:16. ʻOku maʻu ʻa e ngaahi kī ʻo e puleʻangá ʻe he Kau Palesiteni ʻUluakí maʻu pē, T&F 81:2. ʻOku maʻu ʻe he Lakanga Taulaʻeiki Faka-Melekisētekí ʻa e kī ʻo e ngaahi meʻa lilo ʻo e ʻiloʻi ʻo e ʻOtuá, T&F 84:19. Naʻe maʻu ʻe Siosefa Sāmita mo ʻŌliva Kautele ʻa e ngaahi kī ki hono tānaki ʻo ʻIsilelí, mo e ongoongolelei ʻa ʻĒpalahamé, mo e ngaahi mālohi ʻo e fakamaʻú, T&F 110:11–16. ʻOku maʻu ha ngaahi kī makehe ʻe he Kau ʻAposetolo ʻe Toko Hongofulu Mā Uá, T&F 112:16. ʻOku maʻu ʻe he Kau Palesiteni ʻUluakí mo e Toko Hongofulu Mā Uá ʻa e ngaahi kī ʻo e kuonga ʻo e kakato ʻo e ngaahi kuongá, T&F 112:30–34. ʻOku maʻu ʻe he kau ʻōfisa ʻi he lakanga fakataulaʻeikí ʻa e ngaahi kī, T&F 124:123. Ko ia ia ʻokú ne maʻu ʻa e ngaahi kií ʻokú ne lava ʻo maʻu ʻa e ʻilo, T&F 128:11. ʻOku maʻu ʻe he Lakanga Taulaʻeiki Faka-ʻĒloné ʻa e ngaahi kī ʻo e tauhi mai ʻa e kau ʻāngeló mo e ongoongolelei ʻo e fakatomalá mo e papitaisó, SS—H 1:69 (T&F 13).