ʻOku ʻi ai ʻa e faʻahinga kakai ʻe ua ʻi he langí ʻa ia ʻoku ui ko e kau ʻāngeló; ko kinautolu ko e ngaahi laumālié mo kinautolu ʻoku nau maʻu ʻa e sino ʻo e kakano mo e hui. Ko e kau ʻāngelo ko ia ko e ngaahi laumālie, ʻoku teʻeki te nau maʻu ha sino ʻo e kakano mo e hui, pe ko ha ngaahi laumālie pē ʻa kinautolu ʻa ia naʻa nau maʻu ha sino fakamatelie pea ʻoku nau lolotonga tatali ki he toetuʻú. Ko e kau ʻāngelo ko ia ʻoku nau maʻu ʻa e sino ʻo e kakano mo e huí, kuo nau ʻosi toe tuʻu mei he maté pe kuo nau liliu.

ʻOku lahi ʻaupito ʻa e ngaahi fakamatala ʻi he folofolá ʻoku kau ki he ngāue ʻa e kau ʻāngeló. ʻOku lea ʻa e kau ʻāngeló ʻi he taimi ʻe niʻihi ʻi ha leʻo ʻo e mana ʻi heʻenau fakahā mai ʻa e ngaahi pōpoaki ʻa e ʻOtuá (Mōsaia 27:11–16). ʻE lava ʻo ui foki mo ha kakai māʻoniʻoni fakamatelie ko e kau ʻāngelo (LSS, Sēnesi 19:15). ʻOku ʻi ai ha kau ʻāngelo ʻe niʻihi ʻoku nau tauhi pē ki he ʻafioʻanga ʻo e ʻOtuá ʻi he langí (ʻAlamā 36:22).

ʻOku fakamatala foki ʻa e ngaahi folofolá ʻo kau ki he kau ʻāngelo ʻa e tēvoló. Ko e ngaahi laumālie ʻeni naʻa nau muimui kia Lusifā pea naʻe kapusi ʻa kinautolu ki tuʻa mei he ʻafioʻanga ʻo e ʻOtuá ʻi he maama fakalaumālié ʻo kapusi hifo ki he māmaní (Fakahā 12:1–9; 2 Nīfai 9:9, 16; T&F 29:36–37).

Naʻe mamata ʻa Sēkope ki he kau ʻāngelo ʻa e ʻOtuá ʻoku nau ʻalu hake mo ʻalu hifo, Sēnesi 28:12. Naʻe fetaulaki ha kau ʻāngelo ʻa e ʻOtuá mo Sēkope, Sēnesi 32:1–2. Naʻe mamata ʻa Kitione ki ha ʻāngelo ʻa e ʻEikí ko e mata ki he mata, Fakam. 6:22. Naʻe mafao atu ʻa e nima ʻo ha ʻāngelo ki Selūsalema ke fakaʻauha ia, 2 Sam. 24:16. Naʻe ala mai ha ʻāngelo kia ʻIlaisiā mo pehē ange kiate ia, Tuʻu hake ʻo kai, 1 Ng. Tuʻi 19:5–7. Naʻe mamata ʻa Taniela ki he ʻāngelo ko Kepalelí ʻi ha meʻa-hā-mai, Taniela 8:15–16. Naʻe tokoniʻi ʻe he ʻāngelo ko Maikelí ʻa Taniela, Taniela 10:13. Naʻe fekauʻi mai ʻa e ʻāngelo ko Kepalelí mei he ʻao ʻo e ʻOtuá, Luke 1:19, 26–27. ʻE haʻi sēini ʻa e kau ʻāngelo ʻa e tēvoló kae ʻoua kuo hoko ʻa e fakamāú, Sute 1:6 (2 Pita 2:4). Naʻe mamata ʻa e kakaí ki he kau ʻāngelo ʻoku ʻalu hifo mei he langí, 3 Nīfai 17:24. Naʻe tohi ʻa Molonai ʻo kau ki he tauhi mai ʻa e kau ʻāngeló, Molonai 7:25–32. ʻOku maʻu ʻe he Lakanga Taulaʻeiki Faka-ʻĒloné ʻa e ngaahi kī ʻo e tauhi mai ʻa e kau ʻāngeló, T&F 13. Naʻe ʻaʻahi mai kotoa ʻa Molonai, Sione ko e Papitaisó, Pita, Sēmisi, Sione, Mōsese, ʻIlaisiā, mo ʻIlaiase kia Siosefa Sāmita ko e kau ʻāngelo, T&F 27:5–12. ʻE ʻikai te mou lava ʻo kātakiʻi ʻa e tauhi mai ʻa e kau ʻāngeló, T&F 67:13. Ko ʻĀtama, ʻa Maikeli ko e ʻāngelo pulé, T&F 107:54. Ko e kau ʻāngeló ko ha kakai ia kuo nau ʻosi toe tuʻu, pea ʻoku nau maʻu ʻa e sino ʻo e kakano mo e huí, T&F 129. ʻOku ʻikai ha kau ʻāngelo ʻoku nau tauhi mai ki he māmani ko ʻení ka ko kinautolu pē ʻoku nau kau ki aí, T&F 130:5. Ko e kakai ko ia ʻoku ʻikai te nau talangofua ki he fono ʻa e ʻOtuá ki he mali taʻengatá ʻoku ʻikai te nau mali pe foaki ke mali; ka ʻoku fakanofo ʻa kinautolu ko e kau ʻāngelo ʻi he langí, T&F 132:16–17.