Ko ha tokotaha ia ʻoku fili ke puleʻi ia ʻe he ngaahi holi, uʻa, mo e ngaahi ongo ʻo e kakanó kae ʻikai ʻe he ngaahi fakahinohino ʻa e Laumālie Māʻoniʻoní. ʻE mahino ki he tokotaha peheé ʻa e ngaahi meʻa fakakakanó kae ʻikai ko e ngaahi meʻa fakalaumālié. ʻOku fakakakano pe fakamatelie ʻa e kakai kotoa pē, koeʻuhi ko e hinga ʻa ʻĀtama mo ʻIví. Kuo pau ke fanauʻi foʻou ʻa e tokotaha kotoa pē ʻi he fakalelei ʻa Sīsū Kalaisí koeʻuhi ke ʻoua te nau toe hoko ai ko ha tangata fakakakano.

ʻOku ʻikai maʻu ʻe he tangata fakakakanó ʻa e ngaahi meʻa ʻo e Laumālié, 1 Kol. 2:14. Ko e tangata fakakakano ko e fili ia ki he ʻOtuá, kae ʻoua ke liʻaki ia, Mōsaia 3:19. Ko ia ʻokú ne fai atu ʻi hono anga-fakakakanó ʻokú ne nofo maʻu ʻi hono tuʻunga tō ki laló, Mōsaia 16:5 (ʻAlamā 42:7–24; T&F 20:20). Ko hai ha tangata fakakakano ʻokú ne ʻiloʻi ʻa e ngaahi meʻá ni? ʻAlamā 26:19–22. Ko e tangata fakakakanó pe fakanatulá, ʻoku ʻikai te nau maʻu ʻa e ʻOtuá ʻi he māmaní, ʻAlamā 41:11. Tuʻunga ʻi he maumau-fono ʻa e tangatá kuó ne mate fakalaumālie ai, T&F 29:41. ʻOku ʻikai lava foki ʻe ha tangata fakakakano ke kātakiʻi ʻa e ʻao ʻo e ʻOtuá, T&F 67:12. Pea kamata ʻa e tangatá ke anga-fakakakano, faʻa holi kovi, mo anga-fakatēvolo, Mōsese 5:13 (Mōsese 6:49).